Keyptu úr fyrir 2 milljónir með fölsuðum kortum

Tveir karlmenn frá Malasíu voru dæmdir í fangelsi 9 mánaða fangelsi í Héraðsdómi Reykjavíkur í dag, þar af eru sex mánuðir skilorðsbundnir.

Mennirnir keyptu rólex úr í verslun í Reykjavík að verðmæti rúmlega tveggja milljóna króna með tveimur fölsuðum greiðslukortum en bæði kortin voru með stolnum upplýsingum um greiðslukortanúmer annarra korthafa á kortinu og í segulrönd.

Mennirnir fóru þó aldrei út úr búðinni, með úrin, þar sem starfsmenn búðarinnar hringdu á lögreglu eftir að greiðsluposinn gaf til kynna að kortin væru vákort.

Þá sviku mennirnir einnig út gistingu á hóteli með sömu aðferð.

Þegar mennirnir voru handteknir voru þeir með 25 slík kort í fórum sínum. Þeir neituðu sök fyrir dómara og sögðust ekki vita að kortin væru fölsuð.