Hellisheiðin enn lokuð

Hellisheiðin er enn lokuð. Samkvæmt upplýsingum frá Vegagerðinni er unnið að mokstri. Verkið mun sækjast seint því að sumir virðast hafa hunsað lokunina og lagt í ferð yfir Heiðina þrátt fyrir að það væri bannað. Þar hafa þeir síðan fest bílana sína. Þegar Vísir hafði samband við lögregluna á Selfossi hafði hún ekki upplýsingar um það hvernig gengi að losa þá bíla sem fastir voru.

Vegagerðin segir að Þrengslin séu fær öllum bílum en þar er hálka. Flestar aðalleiðir á Suðurlandi eru færar. Þó er ófært á Lyngdalsheiði og Mosfellsheiði, og víða þungfært á fáfarnari sveitavegum.

Hálkublettir eru á Reykjanesbraut en hálka á Suðurnesjum.

Á Vesturlandi er víðast hvar hálka. Þungfært er upp í Húsafell. Ófært er á Útnesvegi, í Álftafirði og á Laxárdalsheiði en verið er að moka Fellsströnd og Skarðsströnd.

Á Vestfjörðum er ófært frá Vatnsfirði og austur yfir Klettsháls. Enn er ófært í Djúpinu, þar er mikill snjór, talsvert um snjóflóð og mokstur gengur hægt. Þó er fært í Ísafirði og yfir Steingrímsfjarðarheiði og Þröskulda. Flughált er í Bæjarhreppi.

Á Norðurlandi er víðast hvar hálka og sumstaðar skafrenningur. Siglufjarðarvegur er ófær og verður ekki opnaður fyrr en á morgun.

Hálka eða snjóþekja er á Austurlandi en á Suðausturlandi er þungfært á Breiðamerkursandi og, þæfingsfærð er milli Kirkjubæjarklausturs og Víkur.