Hellisheiðin aftur lokuð um óákveðinn tíma

Búið er að loka Hellisheiðinni um óákveðinn tíma. Á Hellisheiði og í Þrengslum er nú fyrir hádegi búist við vaxandi hríðarkófi með lélegu skyggni og talsverður skafrenningur verður á Reykjanesbraut fram undir hádegi.

Snjóþekja og snjókoma er á Sandskeiði og hálka í Þrengslum. Flestar aðalleiðir á Suðurlandi eru færar en þó er víða þungfært á fáfarnari sveitavegum. Enn er ófært á Mosfellsheiði og Lyngdalsheiði en unnið að hreinsun

Í tilkynningu frá Vegagerðinni segir að veður fari versnandi þegar líður á morguninn suðvestan- og vestanlands, einkum á fjallvegum. Í byggð hlánar hins vegar smám saman. Á Hellisheiði og í Þrengslum er nú fyrir hádegi búist við vaxandi hríðarkófi með lélegu skyggni og talsverður skafrenningur verður á Reykjanesbraut fram undir hádegi.

Á Vesturlandi er víðast hvar hálka. Ófært er á Útnesvegi og í Álftafirði.

Á Vestfjörðum er ófært frá Vatnsfirði og austur yfir Klettsháls en unnið að hreinsun. Í Djúpinu er þæfingsfærð og aðeins fært á fjórhjóladrifsbílum en áfram er unnið að hreinsun. Þæfingsfærð er einnig í Súgandafirði og unnið að hreinsun. Flughált er í Bæjarhreppi.