Barnalán á Alþingi

Birkir J. Jónsson, varaformaður Framsóknarflokksins, á von á tvíburum. Aðspurður staðfesti hann þetta í samtali við Vísi en vildi að öðru leyti ekkert tjá sig um málið. Vísir hefur ekki fengið upplýsingar um það hvaða kona það er sem gengur með börn Birkis.

Það er ljóst að þingmenn eiga miklu barnaláni að fagna um þessar mundir en á fáeinum mánuðum hafa þau Guðfríður Lilja Grétarsdóttir, Bjarni Benediktsson og Katrín Jakobsdóttir eignast börn. Að auki er Sigmundur Davíð Gunnlaugsson, formanns Framsóknarflokksins og flokksbróðir Birkis, nýbakaður faðir. Þá gengur Katrín Júlíusdóttir iðnaðarráðherra með tvíbura og Brynhildur Einarsdóttir eiginkona Illuga Gunnarssonar, þingmanns Sjálfstæðisflokksins, gengur líka með tvíbura.

Ekkert skal sagt um hvort það sé efnahagsástandið á Íslandi sem hafi þessi áhrif á barneignir þingmanna, en því hefur lengi verið haldið fram að í efnahagssamdrætti fjölgi barneignum.