Hellisheiðin lokuð

Hellisheiði er enn lokuð eins og hún hefur verið frá því klukkan sjö í gærmorgun og ekki er vitað hvenær hægt verður að opna hana á ný. Þoka og ágætis veður er á svæðinu en ástæða lokunarinnar er að ekki hefur tekist að ryðja veginn eftir óveðrið í gær vegna bíla sem voru yfirgefnir á heiðinni.

Samkvæmt upplýsingum frá lögreglunni á Selfossi eru um tíu bílar sem bráðliggur á að fjarlægja. Lögreglan biður eigendur þessarra bíla að fara upp á heiði og sækja þá. Engar björgunarsveitir eru að störfum á heiðinni og þurfa bílaeigendur því að koma bílunum sjálfir í burtu.

Þar af leiðandi bendir lögreglan fólki á að hafa meðferðis skóflu til að moka bíla sína úr sköflum eða koma á vel búnum bíl sem getur kippt bílunum í burtu.