Um sex þúsund tonn af sælgæti

Í dag er laugardagur og þá bjóða margar verslanir upp á helmingsafslátt af nammi í sjálfsafgreiðslu. Almennt borðar hver íbúi að meðaltali um fjögur hundruð grömm af nammi á viku sem er mikið meira en önnur Norðurlönd samkvæmt upplýsingum frá landlækni. Heildarframboð sælgætis á ári hverju hér á landi er um 6000 tonn.

Þá eru tannskemmdir barna og unglinga hérlendis mun algengari en á Norðurlöndum og mun árleg tannverndarvika sem hefst á morgun beina sjónum að ógn sælgætisneyslu við tannheilsu landsmanna.

Hvatt er til að takmarka neyslu sælgætis og sykraðra gosdrykkja og foreldrar finni ef til vill aðra leið til að gera sér glaðan dag segir í tilkynningu frá landlækni.