Björguðu vélsleðamanni

Björgunarsveit frá Hvammstanga var kölluð út á fjórða tímanum í dag þegar tilkynning barst um slasaðan vélsleðamann. Hafði hann ekið fram af snjóhengju í suðurhluta Vatnsnesfjalls fyrir ofan Hvammstanga.

Svo vel vildi til að meðlimir björgunarsveitarinnar voru á heimleið frá æfingu á Arnarvatnsheiði og voru því tiltölulega snöggir á slysstað.

Björgunarsveitin flutti lækni og sjúkraflutningamenn á staðinn þar sem búið var um áverka mannsins og hann búinn til flutnings í björgunarsveitabíl. Reyndist hann vera bæði handleggs- og fótbrotinn en með góða meðvitund. Er hann nú kominn á heilsugæsluna á Hvammstanga.

Um 20 björgunarsveitamenn komu að aðgerðinni.