Tjáir sig ekki um Guðrúnu bæjarstjóra - Þrír flokkar funda í dag

„Ég ætla ekkert að tjá mig um það, ég held að það sé best að við ræðum þetta innan þessa hóps," segir Guðríður Arnardóttir, oddviti Samfylkingarinnar í bæjarstjórn Kópavogs, aðspurð hvort að það komi til greina hjá Samfylkingunni að Guðrún Pálsdóttir, bæjarstjóri, starfi áfram sem bæjarstjóri ef nýr meirihluti verði myndaður.

Sjálfstæðisflokkurinn, Vinstri Grænir og Samfylkingin funduðu á föstudaginn um að hefja formlegar meirihlutaviðræður. Í gær, laugardag, ræddu svo flokkarnir við sitt bakland. Guðríður gerir svo ráð fyrir að flokkarnir þrír hittist svo í síðar í dag og ákveði hvort að formlegar viðræður hefjist.

Hún segist vera bjartsýn um að flokkarnir þrír nái saman. „Ef menn ganga til verks með jákvæðni og með það að markmiði að ná saman, þá held ég að það hljóti að ganga. Þetta snýst um það með hvaða hugarfari menn setjast að samningaborðinu og við öll ætlum að minnsta kosti að gera okkar besta," segir Guðríður.

Guðríður vill ekki gefa upp hvort að Samfylkingin geri einhverjar kröfur, komi til þess að meirihlutaviðræður hefjist. „Það er svo sem ekki góð byrjun á viðræðum að gera kröfur. Þetta snýst um að semja og ná einhverri sameiginlegri niðurstöðu. Það eru auðvitað ákveðin mál sem við teljum mikilvægari að nái í gegn í svona samkomulagi," segir hún.

Aðspurð hvort að Samfylkingin fari fram á að fá bæjarstjórastólinn í samkomulaginu við flokkana tvo, segir Guðríður: „Það er ekkert farið að ræða verkaskiptingu. Það skiptir fyrst og fremst máli hvort við náum saman málefnalega og ef það tekst, getum við farið að ræða framhaldið, það er að segja verkaskiptinguna."