Norðmaður fékk vinning á tvo miða - fær 1,3 milljarða

„Það er sami einstaklingur sem er alltaf með nokkra miða og hann vann í gær," segir Stefán Konráðsson, framkvæmdastjóri Íslenskra getspá, en ofurtalan kom upp í Víkingalottóinu í gær. Potturinn, sem var tæplega 4 milljarðar íslenskra króna, skiptist á sex miða og fær hver og einn því um 650 milljónir á mann.

Fimm af miðunum voru keyptir í Noregi og einn í Finnlandi. En það verður að teljast ótrúleg heppni að karlmaður á þrítugsaldri frá Hörðalandi í Noregi vann tvisvar! Hann var með tvo miða og sömu raðirnar á báðum miðum. Hann fær því um 1,3 milljarða í sinn hlut, sem verður að teljast ágætis upphæð.

„Það fynda við þetta er að þeir vita hver einstaklingurinn er en hann svarar ekki símanum, en þeir hafa einnig reynt að senda honum sms til að láta hann vita," segir Stefán í samtali við Vísi nú í morgun. Enginn Íslendingur fékk hluta af pottinum að þessu sinni. „Það hefði verið yndislegt fyrir þjóðarbúið og gott fyrir gjaldeyrisstöðuna að fá þennan pening. En við Íslendingar höfum verið heppnir í Víkingalottóinu og það mun bara halda áfram."

Ofurtalan kom síðast upp í maí á síðasta ári og því var potturinn orðinn verulega stór, eða um 4 milljarðar eins og áður sagði. Stefán segir að það hafi verið kominn tími á að potturinn færi út. „Þeir búast við því að talan komi upp 6 til 8 sinnum á ári þannig þetta er mjög sérstakt. En það er ánægjulegt að þetta hafi farið út og vonandi veitir þetta þessu fólki góða gleði," segir hann lokum.

Við Íslendingar getum þó huggað okkur við það að tveir spilarar hér á landi voru með 2. vinning, eða með fimm tölur réttar af sex. Og fá þeir því 1,6 milljónir í sinn hlut - ekki er þó vitað hvort að miðarnir tveir séu í eigu sama spilarans.