Pólsk hjón eignuðust fyrsta barnið sem fæddist á Íslandi árið 2012. Þau hafa búið hér í tvö ár og lofa mjög heilbrigðisþjónustuna á Íslandi.
Það var myndarlegur drengur sem kom í heiminn þegar fimm mínútur voru liðnar af nýja árinu. Hann er þrettán merkur og fimmtíu sentimetrar. Fæðingin gekk vel og voru foreldrarnir að tygja sig heim þegar við hittum þau skömmu eftir hádegið í dag.
Móðirin segir það hafa verið sérstakt að fæða barn þegar sprengingarnar stóðu sem hæst.
„Já, allir þessir litir fyrir utan og púff púff púff og á sama tíma þurfti ég að rembast og ýta. En það var í lagi. Það var mjög gott," sagði hin nýbakaða móðir.
Hjónin eiga son á þriðja ári sem fæddist í Skotlandi og hafa því samanburð á milli landanna. Konan segir betra að fæða á Íslandi. „Já, það er allt betra hérna," segir hún.
Sylvester er eitt af þeim nöfnum sem koma til greina á litla drenginn, en það merkir gamlárskvöld á pólsku. Móðirin er þó hrifnari af nafninu Jan.
Pólsk hjón eignuðust fyrsta barnið
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.
