Hætta á vopnuðum átökum fer vaxandi

Afbrotamenn ganga í auknum mæli vopnaðir um götur á Íslandi og telst hætta á vopnuðum átökum fara vaxandi. Þetta kemur fram í áhættumati Ríkislögreglustjóra fyrir þetta ár, sem lögreglan birti opinberlega í dag.

Í matinu segir að í febrúar síðastliðnum hafi greiningardeild Ríkislögreglustjóra sent frá sér skýrslu þar sem sagt var frá vísbendingum um vaxandi spennu í íslenskum undirheimum. Niðurstaða skýrslunnar var einkum sú að hætta færi vaxandi á átökum og jafnvel uppgjöri. Hafi það mat verið byggt á upplýsingum um tilkomu nýrra hópa brotamanna.

Í þessu samhengi bendir lögreglan meðal annars á skotárásina sem gerð var í Bryggjuhverfi þann 18. nóvember síðastliðinn sem tengist vélhjólasamtökunum Outlaws. Við rannsókn málsins lagði lögreglan hald á byssur, skotfæri og hnífa.

Lögreglan segir að þetta dæmi bendi til þess að nýir hópar láti nú til sín taka í samkeppni við erfiðari aðstæður á markaði. Jafnframt sé ástæða til að ætla að hömluleysi fari vaxandi innan þeirra hópa sem einkum láta til sín taka. Þá þróun megi vafalítið í einhverjum tilvikum rekja til neyslu viðkomandi á sérlega hættulegum örvandi efnum sem vitað er að framleidd eru hér á landi.

Þá segir í áhættumati Ríkislögreglustjóra að lögreglan búi yfir upplýsingum þess efnis að skammbyssum sé smyglað inn í landið í einhverju mæli. Fyrir liggur að þekktir hópar afbrotamanna hafi á síðustu misserum lagt áherslu á að komast yfir vopn. Frá árinu 2008 hafi umsóknum um innflutning á skammbyssum fjölgað nokkuð. Það sé mat greiningardeildar að hraða þurfi endurskoðun á skotvopnalöggjöfinni í þeim tilgangi að tryggja örugga vörslu og meðhöndlun slíkra vopna.