Óánægja með Hróarskelduhátíðina

Danskir tónlistargagnrýnendur eru æfir yfir dagskrá Hróarskelduhátíðarinnar og segja hana vægast sagt ömurlega. Danskt tónlistaráhugafólk virðist vera þeim sammála.

„2009 var allt í lagi, 2010 var fyrir neðan meðallag en dagskrá hátíðarinnar í ár er vonlaus,“ skrifar tónlistargagnrýnandi Ekstrablaðsins, Thomas Treo. Hann gefur dagskránni tvær stjörnur af sex mögulegum en samkvæmt netkosningu á vefsíðu blaðsins verðskuldar dagskráin ekki einu sinni svo góða dóma. Þeir sex þúsund sem taka þátt lýsa yfir megnri óánægju og þykir Hróarskelduhátíðin mega muna fífil sinn fegurri. „Mér leið eins og það væri verið að spá hellidembu alla dagana,“ skrifar Treo í gagnrýni sinni. „Maður hefði þurft að búa í helli til að hafa ekki séð Iron Maiden á sviði,“ bætir Theo við en bresku ellirokkarnir eru eitt af aðalatriðunum ásamt The Strokes, Arctic Monkeys og Kings of Leon. Treo bendir á að fjölmörg stór nöfn séu á tónleikaferðum um Evrópu um svipað leyti og Hróarskeldan fer fram en þau hafi hins vegar ákveðið að sniðganga hátíðina. Þar á meðal eru Paul Simon, Metallica, Arcade Fire og Primal Scream. „Og Bob Dylan, sem hefur margoft verið gestur á Hróarskeldu, ákveður að spila í Odense.“

Tónlistargagnrýnandi BT, Steffen Jungersen, tekur undir hvert orð hjá kollega sínum. „Ég ætlaði að vera búinn að skrifa pistil um hátíðina mun fyrr en ég bara trúði ekki mínum eigin augum. Þetta er virkilega glatað,“ skrifar Jungersen. Hann hefur jafnframt sömu áhyggjur af framtíð Hróarskeldu, hátíðir allt í kring geti boðið upp á listamenn á borð við Beyoncé og Coldplay en Danir sitji uppi með Iron Maiden. - fgg