Eldri borgarar aðeins í bað einu sinni í viku

Á Hrafnistu, stærsta hjúkrunarheimili landsins, annar fámennt starfslið því ekki að baða íbúa nema einu sinni í viku. Þegar verst lét þurftu íbúar að bíða í hálfan mánuð eftir því að komast í bað.

„Þetta er örugglega ekki mannsæmandi og ég er ekki viss um að nútímafólk, sem vant er að baða sig einu sinni á dag, myndi láta bjóða sér slíka afarkosti sem vikulegt bað er," segir Pétur Magnússon, forstjóri Hrafnistu.

„Svona bitnar kreppan á elstu borgurum landsins og það er sárt að þjóðfélagið geti ekki komið betur fram við þá öldruðu. Það er umhugsunarefni fyrir stjórnmálamenn. Hrafnista, eins og önnur öldrunar­heimili, á að starfa undir þjónustusamningi við ríkið en hann hefur ekki verið gerður þrátt fyrir ítrekaðar beiðnir árum saman. Nú rétt fyrir áramót var honum svo enn frestað af hálfu ríkisins um þrjú ár."

Valgerður Katrín Jónsdóttir, framkvæmdastjóri Landssambands eldri borgara, segir málefni aldraðra víða þurfa nánari skoðun.

„Gamalt fólk getur hvorki hótað því að fara í verkfall né flytja til útlanda, og er því minnihlutahópur sem auðvelt er að hundsa. Því þarf það að láta margt yfir sig ganga sem beinlínis er mannréttindamál í hugum flestra."

Valgerður segir margt af eldra fólkinu vera orðið of veikt til að bera hönd fyrir höfuð sér. „Og þótt það sé af kynslóð sem ekki var vön daglegum baðferðum hér áður fyrr er krafan allt önnur í dag og það er vitaskuld ósátt við svo fátíð böð enda vill það lifa lífinu með sjálfsvirðingu."

Ekki náðist í Guðbjart Hannesson velferðarráðherra í gær.

- þlg /