Allt stefnir í verkfall í kvöld

Fátt virðist geta komið í veg fyrir að verkfall starfsmanna í fiskimjölsverksmiðjum hefjist í kvöld. Samninganefndir bræðslumanna og Samtaka atvinnulífsins fundu ekki lausn á kjaradeilunni á samningafundi hjá Ríkissáttasemjara í gær.

Ekki er öll von úti því til nýs fundar er boðað í dag. Verði hann hins vegar árangurslaus hefst verkfall í níu fiskimjölsverksmiðjum á Vopnafirði, Seyðisfirði, Neskaupstað, Eskifirði, Fáskrúðsfirði, Hornafirði og í Vestmannaeyjum. Starfsmenn þeirra eru tæplega áttatíu talsins.

Arnar Hjaltalín, formaður Drífanda í Vestmannaeyjum, sagði í gærkvöldi lítið hafa þokast og ekkert nýtt hefði „í sjálfu sér" verið í boði frá hendi Samtaka atvinnulífsins.

Ragnar Árnason, formaður samninganefndar SA, sagðist vera svartsýnn á lausn í dag. „Við gefum þessu einhverja klukkutíma í fyrramálið og vonum það besta," sagði hann í gærkvöldi.

Talsmenn SA og bræðslumanna hafa tekist harkalega á undanfarna daga. Vilhjálmur Egilsson, framkvæmdastjóri SA, hefur gefið í skyn að kröfur fámenns hóps muni skaða hagsmuni félaga þeirra og valda fyrirtækjum og samfélaginu öllu „stórkostlegu tjóni".

Þessu hefur Sverrir Albertsson, framkvæmdastjóri AFLs Starfsgreinafélags, vísað til föðurhúsanna og sagt bræðslumenn hafa sýnt sáttavilja. Þá sé krafan eðlileg þar sem útflutningsfyrirtækin græði á tá og fingri vegna stórbættrar stöðu sinnar eftir hrun sakir gengisþróunar.

Áætlað hefur verið að útgerðin verði af allt að ellefu milljörðum króna ef til verkfalls komi. Þar af séu fimm milljarðar í bræðslu og á bilinu þrír til sex milljarðar í frystum loðnuhrognum.

- shá