Bæta 200 milljónum við rekstur grunnskóla

Til stendur að auka fjárheimildir til rekstur grunnskóla í Reykjavík um allt að 200 milljónir króna frá því sem gert var ráð fyrir í fjárhagsáætlun Reykjavíkurborgar fyrir þetta ár. Tillaga þessa efnis verður lögð fram í borgarráði á fimmtudaginn.

Að sögn Oddnýjar Sturludóttur, borgarfulltrúa og formanns menntaráðs, er tilgangurinn sá að verja skólastarf. Við gerð fjárhagsáætlunar hafi sá varnagli verið hafður á að viðræður sveitarfélaga við ráðherra um tímabundnar breytingar á grunnskólalögum bæru árangur. Litlar líkur séu taldar á að þær gangi eftir og því eru borgaryfirvöld að bregðast við núna.

„Það er búið að grandskoða stöðu skólanna í Reykjavík. Uppsafnaður vandi er mikill því mikið hefur verið hagrætt sérstaklega í forföllum og gæslu frá bankahruni," segir Oddný. Hún segir að við gerð fjárhagsáætlunar hafi verið ákveðið að skoða stöðu skólanna gaumgæfilega og skólastarf myndi ekki hefjast nema að fyrir lægi að borgaryfirvöld gætu verið stolt af góðu skólastarfi. Nú liggi fyrir að hagræðingarkrafan sem hafi verið gerð til skólastarfs í fjárhagsáætlun hafi verið of mikil og úr því þurfi að bæta. Því standi til að standa vörð um kennslu og bæta í þegar kemur að forföllum og gæslu.

Oddný segir að engu að síður sé menntaráð sannfært um að til að hægt sé að standa vörð um skólastarfið sjálft sé mikilvægt að fara að fara í kjarkmiklar breytingar á skipulagi skóla- og frístundastarfs. Þar bendir Oddný á betri nýtingu húsnæðis, fela færri stjórnendum stærri verkefni, mögulega sameiningu leikskóla, grunnskóla eða leik- og grunnskóla og samþættingu skóla og frístundastarfs.

Þá bendir Oddný á að framlög hafi verið aukin til leikskólasviðs um 658 milljónir frá því í fyrra vegna mikilla fjölgunar barna. „Sú endurskipulagning sem nú standi yfir leiði í ljós að með öðruvísi og betri nýtingu húsnæðis getum við tryggt öllum þessum börnum leikskólapláss og sparað milljarða í framkvæmdakostnaði," segir Oddný.