Írskur boxari og stamandi konungur í kvikmyndahús

Fjórar kvikmyndir verða frumsýndar hérlendis á morgun. Tvær þeirra voru á þriðjudag tilnefndar til nítján Óskarsverðlauna samanlagt.

Kvikmyndaunnendur hafa úr fjórum nýjum kvikmyndum að velja þessa helgina. Þær eru The Fighter, The King"s Speech, The Dilemma og From Prada to Nada.

The Fighter er sannsöguleg hnefaleikamynd með Mark Wahlberg í hlutverki boxarans Micky Ward. Hann var alltaf kallaður „Sá írski" og náði að verða heimsmeistari í veltivigt. Myndin segir frá ævintýralegri leið hans að titlinum og samskiptum hans við hálfbróður sinn, fyrrverandi boxarann Dicky, sem lenti ungur á glæpabrautinni og í dópneyslu. Christian Bale fer með hlutverk Dicky á eftirminnilegan hátt og þykir líklegur til að hreppa Óskarinn sem besti leikari í aukahlutverki. Leikstjóri The Fighter er David O. Russell sem hefur áður unnið með Wahlberg við myndirnar I Heart Huckabees og Three Kings.

The King"s Speech leiðir kapphlaupið til Óskarsverðlaunanna með tólf tilnefningar. Myndin segir frá manni sem seinna varð George VI. konungur Bretlands, og faðir núverandi drottningar, Elísabetar II. Eftir að bróðir hans afsalar sér völdum tekur George, eða „Bertie" eins og hann var kallaður, við krúnunni. Mikið stam plagar hann og hann er engan veginn tilbúinn til að verða konungur. Hann leitar því til óhefðbundins talmeinafræðings, Lionels Logue, í von um að fá bót meina sinna.

Colin Firth leikur konunginn og er tilnefndur til Óskarsins rétt eins og meðleikarar hans, þau Geoffrey Rush og Helena Bonham Carter. Leikstjóri The King"s Speech er Tom Hooper sem gerði hina vönduðu sjónvarpsþætti John Adams.

Vince Vaughn, Kevin James og Winona Ryder eru í helstu hlutverkum í gamanmyndinni The Dilemma. Hún fjallar um vinina Ronny og Nick sem eiga bílahönnunarfyrirtæki. Þegar Ronny sér eiginkonu Nicks með öðrum manni vandast málin og við tekur skondin atburðarás. Leikstjóri er Ron Howard, sem hefur sent frá sér myndir á borð við Angels & Demons, Frost/Nixon, The Da Vinci Code og A Beautiful Mind.

From Prada to Nada er rómantísk gamanmynd undir áhrifum frá skáldsögu Jane Austen, Sense and Sensibility. Hún fjallar um tvær systur sem fæðast með silfurskeið í munni en missa allt þegar faðir þeirra deyr. Aðstæður þeirra gjörbreytast þegar þær þurfa að flytja til fátækrar frænku sinnar í austurhluta Los Angeles.

freyr@frettabladid.is