Verða að setja kirkju að veði fyrir gjöldum

„Gera verður kröfu til þess að Söfnuður Moskvu-patríarkatsins lúti sömu lóðaskilmálum og allir aðrir,“ segir í umsögn sem borgarráð samþykkti og varðar lóða­leigu til rússnesku rétttrúnaðar­kirkjunnar.

Eins og komið hefur fram í Fréttablaðinu er borgin að ganga frá samningi við Söfnuð Moskvu-patríarkatsins um lóð fyrir rússnesku rétttrúnaðarkirkjuna á tveimur samliggjandi lóðum ofan við Mýrargötu. Þar á að rísa kirkja, safnaðarheimili og íbúð fyrir prest. Ekki hefur náðst samkomulag um nokkur atriði og málið því dregist.

Söfnuðurinn óskaði eftir því að vera undanþeginn ákvæði sem er í hefðbundnum lóðaleigusamningum borgarinnar um að mannvirki á lóðum séu að veði fyrir lóðarleigu, fasteignagjöldum og öðrum opinberum gjöldum vegna lóðarinnar og mannvirkja á henni. Er það vegna reglna safnaðarins sjálfs um að ekki megi veðsetja kirkjulegar eignir hans.

„Reglur þessar hafa ekkert formlegt gildi nema hjá söfnuðinum,“ segir í umsögn Ágústs Jónssonar, skrifstofustjóra hjá framkvæmda- og eignasviði borgarinnar. Þar kemur fram að söfnuðurinn bjóðist til að leggja fram bankaábyrgð til að tryggja greiðslu áðurnefndra gjalda en að þeirri lausn sé hafnað. „Söfnuðurinn getur hins vegar, ef honum sýnist svo, átt bankainnstæður eða aðrar slíkar tryggingar sem verja hann gegn áföllum vegna hugsanlegra vanskila á opinberum gjöldum.“

Þá er hvorki fallist á þá kröfu safnaðarins að hann fái kauprétt að umræddum lóðum né forkaupsrétt ef borgin vill ekki framlengja samninginn að loknum leigutímanum, sem er fimmtíu ár. Hins vegar er orðið við ósk safnaðarins um að bæta 180 fermetrum í borgarlandinu við kirkjulóðina og að gefinn sé þriggja ára frestur til að ljúka framkvæmdum í stað aðeins tveggja ára. Samkvæmt upphaflegu samkomulagi frá því í júlí 2007 mun söfnuðurinn ekki greiða gatnagerðargjöld.

Fulltrúar Söfnuðar Moskvu-patríarkatsins munu enn vilja nánari skoðun á lóðaskilmálunum en innan borgarkerfisins er frágangur samningsins þó talinn á lokastigi. Samkvæmt upplýsingum frá skipulags- og byggingar­sviði borgarinnar hafa engar teikningar af kirkjubyggingunum enn borist þangað. Þær hugmyndir sem hafa óformlega verið kynntar fela í sér hönnun í hefðbundnum rússneskum kirkjustíl. gar@frettabladid.is