Lokaði skemmtistað - handtók hnífamann

Lögreglan á höfuðborgarsvæðinu hafði afskipti af gleðskap í heimahúsi í Kópavogi um klukkan sex í morgun. Slagsmál höfðu brotist út en lögreglu tókst að stilla til friðar án þess að handtaka neinn. Þá lokaði lögrelgan skemmtistað í miðborg Reykjavíkur í nótt þar sem staðurinn var ekki með tilskilin leyfi. Tveir voru teknir fyrir ölvunarakstur í höfuðborginni í nótt.

Lögreglan á Akureyri lokaði tvo menn inni í nótt fyrir ölvun, óspektir og leiðindi. Þá voru tveir teknir fyrir fíkniefnaakstur. Að öðru leyti fór nóttin ágætlega fram, þrátt fyrir mikinn fjölda fólks í bænum.

Ungur maður var vistaður í fangageymslur lögreglunnar í Vestmannaeyjum eftir að hafa dregið fram hníf á veitingastað og otað að öðrum matargestum. Að sögn lögreglu var maðurinn rétt um tvítugt, mikið drukkinn og nokkuð ruglaður. Skýrsla verður tekin af manninum eftir að runnið hefur af honum.