Leita að rödd Benedikts Gröndal

Bókaútgáfan Crymogea leitar nú að karlmanni sem gæti túlkað rödd Benedikts Gröndal. Sá sem fyrir valinu verður mun lesa lýsingar Benedikts á íslenskum fuglum.

Hugmyndin er sú að upptökurnar verði notaðar sem viðbót sem fylgi með stafrænni útgáfu af einu helsta verki hans, Íslenskum fuglum. Þá verður hún einnig notuð í auglýsingar.

Benedikt var um sjötugt þegar verkið kom út, og því er helst leitað að eldri karlmönnum. Röddin á helst ekki að vera það kunnugleg að fólk tengi hana við nafntogaða leikara eða aðra vel raddaða menn, en ljóst er að viðkomandi verður að hafa einhverja reynslu af því að lesa upp og beita röddinni.

Margir helstu sérfræðingar í verkum Benedikts hafa sett fram hugmyndir um hvernig rödd Benedikts gæti hugsanlega hafa hljómað þegar hann var um sjötugt. Þeir telja hana hafa verið hrjúfa, en þó klingjandi skýra af vitnisburði samferðamanna hans að dæma.

Þeir sem hefðu áhuga á að tala fyrir munn Benedikts Gröndal eru beðnir um að hafa samband við bókaútgáfuna Crymogeu í síma 5110910.