Ánægja með fundaferð Hönnu Birnu

Hanna Birna Kristjánsdóttir átti fund með flokksmönnum sínum á Ísafirði í gær. Fundurinn er upphaf fundaferðar þar sem Hanna Birna ætlar sér að ferðast um landið og ræða um framboð sitt til formanns Sjálfstæðisflokksins við flokksmenn sína.

Halldór Halldórsson, fyrrverandi bæjarstjóri Ísafjarðarbæjar skipulagði fundinn. Hann sagði fólk almennt mjög ánægt með fundinn. „Það sem stóð helst uppúr hjá fólki eftir fundinn var hversu vel Hanna Birna var inni í málum," sagði Halldór og bætti við að fólk teldið það mikinn styrk fyrir flokkinn að fá að velja milli tveggja glæsilegra formannsefna. Halldór er sjálfur stuðningsmaður Hönnu Birnu.

Í næstu viku mun Hanna Birna ferðast um landið, en enn hefur ekki verið ákveðið nákvæmlega hvar fundir munu fara fram. Hún stefnir að því að komast yfir sem mest af landinu.

Gagnrýni á framboðið

Framboð Hönnu Birnu hefur nokkuð verið gagnrýnt fyrir tilgangsleysi. Meðal annarra kom Tryggvi Þór Herbertsson, sjálfstæðismaður fram í útvarpsþætti í morgun og lýsti vonbrigðum vegna þess að framboðið felur ekki í sér neina stefnubreytingu eða nýjar áherslur.

Við þessari gagnrýni vísaði Halldór til þess sem Hanna Birna hefur áður sagt. „Hún er valkostur í formannskosningum. En hún er ekki að boða neina nýja stefnu, enda væri það svolítið skrítið. Skylda formanns er að fara eftir þeirri stefnu sem ákveðin er á landsfundi flokksins hverju sinni," sagði Halldór, en bætti við að nýjum einstaklingi í formannsstól hljóti þó óhjákvæmilega að fylgja áherslubreytingar.