Ánægð með þrjátíu ára stjórnmálaferil

Ingibjörg Sólrún Gísladóttir segist sátt við þrjátíu ára feril sinn í stjórnmálum þegar hún horfir yfir farinn veg, en á morgun heldur hún utan til New York og þaðan til Kabúl þar sem hún verður yfirmaður jafnréttisstofnunar Sameinuðu þjóðanna í Afganistan

Ingibjörg Sólrún fyrrverandi utanríkisráðherra heldur utan til New York á morgun og mun í næstunni funda með starfsfólki Sameinuðu þjóðanna. Hún mun svo um næstu helgi flytja til Kabúl, þar sem hún verður yfirmaður jafnréttisstofnunar UN Women í Afganistan.

Ingibjörg Sólrún segir að óskaplega margt brenni á konum í Afganistan, t.d búa konur þar við mikið ofbeldi af margvíslegum toga, þá er menntunarskortur og ólæsi stórt vandamál. Konur í landinu eru almennt réttlitlar og eiga erfitt með að afla sér lifibrauðs.

Þegar Ingibjörg Sólrún ávarpaði flokkstjórnarfund Samfylkingarinnar 17. apríl í fyrra sagðist hún hafa brugðist Samfylkingunni og kjósendum flokksins. En hún segist kveðja landið sátt.

Ingibjörg glímdi við erfið veikindi sem hún hefur nú sigrast á.