Barist um rjómakökur og jólaskraut

Hringskonur héldu í dag sinn árlega jólabasar en hann er afrakstur ársvinnu félagskvenna og helst fjáröflun Hringsins. Það varð uppi fótur og fit þegar basarinn var opnaður og barist um rjómakökur og jólaskraut.

Jólabasar Hringsins er ómissandi þáttur í undirbúningi jólanna en Hringskonur hefja undirbúning í janúar og hittast vikulega allt árið til að föndra, sauma og prjóna. Það voru þó nokkrir búnir að safnast saman fyrir utan salinn á Grand Hótel í dag áður en basarinn opnaði til að vera viss um að næla sér í sína uppáhaldshluti.

„Ég kem alltaf hérna árlega og finnst gaman að kaupa þessi tré hjá þeim,“ sagði Erla sem var meðal þeirra sem athuguðu basarinn í dag.

Hátt í hundrað konur koma að basarnum og var boðið upp á jólaskraut, jólakort, hannyrðir og auðvitað kökurnar frægu en allur ágóði rennur til góðra málefna Hringsins.

Í myndbandinu að ofan er púlsinn tekinn á basar-gestum og rætt við Valgerði Einarsdóttur, formann Hringsins.