Samkeppni um nýtt hótel við Ingólfstorg

Samkeppni um hönnun við sunnanvert Ingólfstorg á að ná fram heildarlausn fyrir skipulag svæðisins, þar á meðal er 130 herbergja hótel. Einnig er ætlunin að „laða fram lausnir á framtíð húsanna við Vallarstræti 4 og Aðalstræti 7“.

Það er skipulags- og eignasvið Reykjavíkurborgar í samvinnu við lóðarhafa á svæðinu og Arkitektafélag Íslands sem gengst fyrir samkeppninni sem verður í tveimur þrepum. Fyrri hlutinn er hugmyndasamkeppni og þá hafa allir þátttökurétt. Á þessu stigi er lögð áhersla á skipulag svæðisins og frumhönnun hótels. Allt að fimm tillögur verða valdar til að halda áfram á seinna þrepið og fá tvær milljónir króna hver til að vinna hugmyndir sínar áfram.

Seinni hlutinn er framkvæmd keppni þar sem á að útfæra almenningsrýmin nánar og forhanna hótel. Á þessu stigi verður einhver með réttindi til að leggja fram aðaluppdrætti að skrifa upp á tillögur. Fyrstu verðlaun er 2,5 milljónir króna auk tveggja milljóna króna útfærslugreiðslu.

Samkvæmt samkeppnislýsingunni sem samþykkt hefur verið í skipulagsráði nær hönnunarsvæðið yfir Ingólfstorg, Aðalstræti 7 og 11, Vallarstræti 4 og Thorvaldsenstræti 2, 4 og 6 auk almenningsreitsins Víkurgarðs. Svæðið afmarkast því af Aðalstræti, Hafnarstræti, Veltusundi, Vallarstræti, Thorvaldsenstræti og Kirkjustræti.

Dómnefndin hefur þegar verið skipuð og er Páll Hjaltason, arkitekt og formaður skipulagsráðs, formaður hennar. Nefndin segist telja kost að húsin á Aðalstræti 7 og Vallarstræti 4 verði á sínum stað en annars skuli þau flutt til innan reitsins. Þá skuli „reikna með“ að húsið Thorvaldsenstræti 2, sem er gamli Kvennaskólinn standi óbreytt enda sé það friðað. Staðsetning hótelsins sé frjáls innan svæðisins en það megi þó ekki vera í Víkurgarði og eigi að falla að núverandi byggð.

Torfi Hjartarson, fulltrúi vinstri grænna í skipulagsráði, segir keppnislýsinguna óskýra og þar sé ekki minnst á kraftmikil mótmæli vegna fyrri hugmynda um hótelbyggingu á reitnum. „Ekkert kemur fram um mögulega varðveislu á samkomu- og tónleikasal í Sjálfstæðishúsi eða Nasa,“ segir Torfi einnig.

„Sú grunnforsenda lóðarhafa að reisa þurfi rými fyrir 130 herbergja hótel með öllu sem því fylgir á þessu viðkvæma svæði fellur illa að keppni um opna nálgun þar sem kapp er lagt á að styðja vel við gamla byggð,“ segir í greinargerð sem Torfi lagði fram í skipulagsráði. Hann telur samruna lóða og umfangsmikið hótel í hjarta Kvosarinnar tefla í tvísýnu sumum af elstu götumyndum landsins. gar@frettabladid.is