Veðmálasíða telur meiri líkur á að Hanna Birna nái kjöri

Hanna Birna Kristjánsdóttir, oddviti Sjálfstæðisflokksins í borgarstjórn, og Bjarni Benediktsson, formaður Sjálfstæðisflokksins, bítast um formannsstólinn á landsfundi Sjálfstæðisflokksins sem fram fer daganna 17. til 20. nóvember næstkomandi.

Veðmálasíðan Betsson hefur nú sett af stað veðmál um hver nær kjöri sem formaður flokksins. Stuðullinn á að Hanna Birna verði kjörinn formaður er 1.50 á meðan stuðullinn á sitjandi formann er 2.40. Sá sem veðjar fyrir 10 þúsund krónur fær því 15 þúsund krónur greiddar út ef Hanna Birna verður kjörinn formaður en 24 þúsund ef Bjarni sigrar.

Hanna Birna tilkynnti um framboð sitt á fimmtudaginn í síðustu viku en Bjarni Ben hafði áður gefið það út að hann ætlaði að sækjast eftir endurkjöri. Mikið hefur verið fjallað um framboðin og í skoðanakönnun MMR um miðjan september síðastliðinn sögðust 59 prósent aðspurðra frekar vilja Hönnu Birna en Bjarna sem formann flokksins.

Veðmálasíðan Betsson.