Rannsóknin gengur ágætlega - gæsluvarðhald rennur út á morgun

Rannsókn lögreglunnar á höfuðborgarsvæðinu á umfangsmesta fíkniefnamáli ársins er í fullum gangi og gengur ágætlega, að sögn Friðriks Smára Björgvinssonar yfirlögregluþjóns. Ekki er hægt að veita frekari upplýsingar um rannsóknina að svo stöddu.

Fíkniefnapakkinn, sem innihélt mikið magn af e-töflum og einnig kókaín, amfetamín og stera, var sendur á lítið fyrirtæki hér landi í október síðastliðnum.

Gæsluvarðhald yfir karlmanni á sextugsaldri, sem er starfsmaður fyrirtækisins, rennur út á morgun og segir Friðrik Smári að tekin verði ákvörðun um það á morgun hvort farið verði fram á framlengingu á því.

Við sögðum frá því í lok síðasta mánaðar að maðurinn hafi aldrei komið við sögu lögreglu áður. Heimildir fréttastofu herma að hann telji sig hafa verið svikinn í málinu. Hann hafi einungis verið beðinn um að koma pakka sem innihéldi stera hingað til lands. Og hafi því ekki haft hugmynd um hið mikla magn fíkniefna.

Annar karlmaður, á fimmtugsaldri, var úrskurðaður í gæsluvarðhald til 11. nóvember næstkomandi.

Rannsókn lögreglu er afar umfangsmikil og mikil vinna að baki, sem hefur staðið yfir um nokkra vikna skeið. Lögreglan hefur unnið verkefnið í samvinnu við tollgæsluna.