Bannað verði að flytja inn lifandi dýr og hrátt kjöt

Það hlýtur að verða algert skilyrði við hugsanlega inngöngu Íslands í Evrópusambandið að takmarkanir verði settar við innflutning á lifandi dýrum og hráu kjöti til Íslands. Þetta sagði Jón Bjarnason, sjávarútvegs- og landbúnaðarráðherra, á opnum fundi atvinnuveganefndar og utanríkismálanefndar á Alþingi í dag. 

„Fyrir mér er þetta hluti af okkar fæðuöryggi og hluti af því að við stöndum vörð um okkar viðkvæma búfé,“ sagði Jón þegar flokksystir hans, Guðfríður Lilja Grétarsdóttir, spurði hann út í málið á fundinum.

Jón tók það reyndar skýrt fram að hann byggist við því að aðildarsamningur yrði felldur í þjóðaratkvæðagreiðslu. „Eins og ég held að við gerum flestöll ráð fyrir,“ bætti hann við.