Of snemmt að lýsa yfir goslokum

Of snemmt er að lýsa yfir goslokum í Grímsvötnum segja jarðeðlisfræðingur. Enginn gosmökkur kemur upp úr gígnum en það geta enn komið sprengingar sem skjóta upp gjósku. Mjög varhugavert er að ferðast um svæðið.

Gosið í Grímsvötnum hefur verið að fjara út undanfarinn sólarhring. Í gærkvöldi magnaðist gosmökkurinn upp í 7 kílómetra hæð og um 12 kílómetra í nótt. Í morgun bárust síðan þær fregnir frá ferðamönnum á svæðinu að gosinu væri lokið og einungis sjáanlegir gufustrókar eins og þessi sem Karl Ólafsson fjallaleiðsögumaður myndaði.

Flugvél Landhelgisgæslunnar, TF-SIF, fór í leiðangur um gosstöðvarnar í dag og reyndi að komast að því hvort að gosinu væri lokið.

Lítið skyggni var vegna gjóskumisturs og því gátu vísindamenn ekki skoðað gosstöðvarnar nógu vel. Þeir fengu hins vegar upplýsingar frá lítilli vél sem komst nær.

„Hún tók eftir að það voru sprengingar ennþá í gígnum, þannig það er einhver virkni og þó að á sumum stundum sjáist bara litlir gufubólstrar þá sáum við þess dæmi í eftirlitsflugi í gærkvöldi að það geta ennþá verið mjög öflugar spreningar. Mökkurinn gildnar alveg fjórfalt, þetta er ekki stöðugur mökkur, þannig að það fellur gjóska mjög víða í kringum gíginn. Þannig þetta er mjög hættulegt svæði að fara á og fólk verður að fara varlega," segir Björn Oddsson, jarðeðlisfræðingur.

Hann segir þetta vera eðlilega þróun á Grímsvatnagosi.

„Þetta getur verið ástand sem varir í einhvern tíma, þ.e. spreningar og smá virkni og ómögulegt að segja hvort hún rífi sig upp aftur. Engan veginn hægt að lýsa yfir goslokum," segir Björn.

Askan veldur enn vandræðum í Evrópu en 450 flugum var aflýst í Þýskalandi. Flugumferð í Bretlandi er þó að komast aftur í samt horf. Þá býst Evrópska loftferðaeftirlitið ekki við neinum truflunum á flugi á morgun.

Íslenska öskuspáin gefur til kynna að askan muni ekki hafa áhrif á flugvelli hér á landi á morgun en mögulega mun flug yfir lofthelgi Íslands truflast vegna öskuskýsins samkvæmt upplýsingum frá Isavia.