Piven orðaður við hlutverk Sheens

Leikarinn Jeremy Piven hefur bæst í hóp þeirra sem eru orðaðir við hlutverk Charlie Sheen í þáttunum Two and a Half Men. Piven er þekktastur fyrir hlutverk sitt í þáttunum Entourage þar sem hann leikur umboðsmanninn ósvífna Ara Gold.

Mikil óvissa ríkir um framtíð Two and a Half Men eftir að Charlie Sheen var rekinn úr aðalhlutverki þáttanna. Sjónvarpsstöðin CBS er undir mikilli pressu að leysa úr flækjunni og annað hvort halda áfram framleiðslu þáttanna með nýjum aðalleikara eða hreinlega hætta framleiðslunni. Hafa leikararnir Rob Lowe og John Stamos einnig verið orðaðir við hlutverk Charlie Sheen.

„Jeremy er frábær leikari og afar vinsæll,“ er haft eftir heimildarmanni úr herbúðum CBS í fjölmiðlum vestanhafs. „Nafn hans hefur komið upp í umræðum um framtíð þáttanna. Ef einhver getur fyllt skarð Charlie þá er það hann.“

Þessi ummæli komu fjölmiðlafulltrúa Jeremy Piven á óvart, enda hefur enginn frá CBS haft samband við hann um hugsanlegt hlutverk í þáttunum, samkvæmt yfirlýsingu sem hann sendi frá sér í vikunni.