Elvis syngur í Hörpunni

Bandaríski tónlistamaðurinn Elvis Costello heldur tónleika í Hörpunni hinn 21. nóvember næstkomandi. Þetta er í annað sinn sem Costello kemur til Íslands en aftur á móti fyrstu tónleikarnir hans; hann kom hingað til lands og hlýddi á tónleika eiginkonu sinnar, Diönu Krall, árið 2003. Elvis Costello verður einn á sviði og hyggst flytja öll sín bestu lög auk þess sem áhugasamir geta farið inn á heimasíðu hans, elviscostello.com, og beðið um óskalög.

 

„Það hefur lengi verið draumur hjá mér að flytja hann inn, alveg síðan 2003 þegar hann kom hingað með Krall,“ segir Einar Bárðarson, sem snýr nú aftur í hlutverk tónleikahaldara eftir fjögurra ára fjarveru. „Ég fór og sótti hann út á flugvöll þegar hann kom hingað á sínum tíma og ég man eftir því að við spjölluðum heilmikið um Tony Bennett, sem var í miklu uppáhaldi hjá okkur báðum. Ég er mikill Costello-aðdáendi, hef fylgst með honum síðan ég var smápatti,“ segir Einar.

 

Þetta eru fjórðu tónleikarnir sem tilkynnt er um í Hörpunni með erlendum dægurtónlistarmönnum. Fyrstur reið á vaðið Jamie Cullum, svo kom Cindi Lauper, Afro Cubism og loks Elvis. „Ég fór og skoðaði Hörpuna í vikunni og get fullyrt að þetta er fyllilega á pari við það sem gengur og gerist úti í heimi, það er náttúrulega bara ótrúlegt að svona hús skuli vera komið til að vera. Menn geta rifist endalaust um kostnaðinn en Harpan, hvort sem mönnum líkar það betur eða verr, á eftir að standa þarna næstu hundrað árin.“

 

Síðustu tónleikarnir sem Einar kom að voru Bob Dylan og James Blunt en síðan hvarf hann af sjónarsviðinu og hóf rekstur útvarpsstöðvarinnar Kanans. Hann segist kannski ekki alveg vera kominn á fulla ferð á ný en landslagið sé vissulega breytt, fólk fari ekki lengur tvisvar til útlanda á ári og leiti því að afþreyingunni innanlands. „En maður þarf að fara varlega af stað og velja réttu listamennina. Á meðan fólk kaupir miða og gleðst saman er aldrei að vita,“ segir Einar og tekur fram að dýrustu miðarnir verði sennilega í kringum tíu þúsund krónur.

 

freyrgigja@frettabladid.is