Frestun Drekaútboðs lýsir ömurlegri verkstjórn

Það er til háborinnar skammar fyrir stjórnvöld að Drekaútboðið skuli frestast, segir Kristján Þór Júlíusson, oddviti sjálfstæðismanna í Norðausturkjördæmi. Hann segir þetta klúður, sem lýsi ömurlegri verkstjórn í ríkisstjórn og á Alþingi.

Orkumálastjóri hefur upplýst að fresta þurfi útboði olíuleitar á Drekasvæðinu, sem átti að hefjast eftir sex vikur, um þrjá til fjóra mánuði, sökum þess að Alþingi lögfesti ekki þrjú frumvörp, sem voru forsenda útboðsins. Frumvörpin höfðu öll verið afgreidd án ágreinings úr þingnefndum og biðu lokaafgreiðslu. Kristján Þór Júlíusson segir þetta gerast vegna ömurlegrar verkstjórnar á störfum ríkisstjórnar og Alþingis.

„Þeir sem eiga að ráða för, stýra skútunni, þeir hafa ekkert yfirlit yfir þau þjóðþrifamál sem þarf að koma fram, því miður. Þetta var allt í einum grautarpotti og engin heildaryfirsýn," segir Kristján Þór.

Spurður um hverjir bera ábyrgðina, svarar hann: „Forsætisráðherra og formenn þingflokka ásamt þeim ráðherrum sem hafa yfirumsjón með viðkomandi málaflokkum."

Kristján Þór kveðst hallast að því að þetta hafi verið klúður fremur en viljaverk. "Ég vil nú hallast að því að sé klúður. Það eru hins vegar til kenningar um það að Vinstri grænir hafa alltaf verið á móti olíuvinnslu á hafsvæðinu við landið. Síðan er sú kenning uppi að Samfylkingi hafi ekkert á móti því að það dragist að fá jákvæðar niðurstöður af olíuleit við Ísland áður en niðurstaða aðildarviðræðnanna, sem hún rekur af fullum krafti, liggur fyrir."

„Þetta er náttúrlega öllum sem um þessi mál sýsla til háborinnar skammar að svona hafi farið. Þarna er vitað að menn hafa mikinn áhuga á því að kanna þau verðmæti sem Íslendingar geta hugsanlega ráðið yfir í þessari auðlind. Og ef við höfum ekki fulla þörf á því að ganga úr skugga um getu okkar til góðra verka á þeim tímum sem við lifum á núna þá höfum við aldrei þörf fyrir það. Þetta er bara til háborinnar skammar fyrir þau stjórnvöld sem ráða för um þessar mundir," segir Kristján Þór Júlíusson.