Talið að smyglleiðin hafi verið notuð áður

Lögregla telur að smyglleiðin sem notuð var þegar tugum kílóa af fíkniefnum var komið hingað til lands með gámaskipi frá Hollandi, hafi verið notuð áður. Tveir menn hafa verið úrskurðaðir í gæsluvarðhald vegna málsins, sem er það stærsta sem komið hefur upp hér á landi á árinu.

Það var hinn tíunda október sem lögreglan lagði hald á sendingu sem kom hingað til lands með gámaskipi frá Hollandi. Í sendingunni voru, samkvæmt heimildum fréttastofu, einhverjir tugir kílóa af fíkniefnum, meðal annars e-pillur, kókaín, amfetamín og sterar.

Sendingin var stíluð á lítið heildsölufyrirtæki í matvælaiðnaði hér á landi og var starfsmaður þess handtekinn og úrskurðaður í gæsluvarðhald í kjölfarið.

Maður sem talinn er vera höfuðpaurinn í málinu kom síðan hingað til lands með flugi um helgina og var handtekinn við komuna til landsins. Hann var í kjölfarið úrskurðaður í gæsluvarðhald til 11.nóvember.

Rannsókn lögreglu er afar umfangsmikil og hefur meðal annars verið stuðst við símhleranir, sem hafa staðið yfir síðan í byrjun sumars eftir því sem fréttastofa kemst næst.

Þá grunar ögreglu að þessi tiltekna smyglleið, það er að segja, sending með gámaflutningaskipi frá Hollandi til Íslands hjá þessu tiltekna fyrirtæki, hafi verið notuð oftar en í þetta eina skipti.

Athygli vekur þó að starfsmaður fyrirtækisins sem nú situr í gæsluvarðhaldi, hefur ekki komist í kast við lögin áður.

Fréttastofa hefur rætt við forstjóra fyrirtækisins vegna málsins sem vildi lítið tjá sig. Hann sagði þó að fyrirtækið tengdist málinu ekki á neinn hátt.