Dó snillingurinn úr heimsku?

„Það er svo sem ein leið til að kalla þetta, já," segir Sigurður Guðmundsson, forseti heilbrigðisvísindasviðs Háskóla Íslands og fyrrum Landlæknir, í samtali við þáttinn Reykjavík síðdegis á Bylgjunni. Hann var spurður hvort að það hafi verið heimska í snillingnum Steve Jobs, að fara ekki hinar hefðbundu leiðir í baráttu sinni við krabbameinið sem hann greindist með fyrr á þessari öld.

Jobs kaus að fara aðrar aðferðir en hinar venjulegu til að losna við krabbameinið í brisinu. Hann fór til dæmis ekki í uppskurð heldur fór aðrar leiðir, svo sem að breyta mataræðinu og ýmislegt fleira.

„...En kannski skrifast þetta frekar á vanþekkingu þó að maðurinn hafi verið snillingur á sínu sviði. Það þarf ekki endilega að tákna að maður sé alltaf með allt annað á hreinu,“ segir Sigurður. „En skilaboðin og lærdómurinn af þessu er að ef fólk finnur til einkenna og óþæginda er rétt að leita hjálpar,“ segir Sigurður.

Hægt er að hlusta á viðtalið við Sigurð með því að smella á hlekkinn hér að ofan.