Tabú að ræða um stöðu RÚV á auglýsingamarkaði

„Það er nú dæmi um stöðu að okkar mati sem er ekki á jafnréttisgrundvelli," sagði Páll Gunnar Pálsson, forstjóri Samkeppniseftirlitsins í þættinum Reykjavík síðdegis á Bylgjunni í dag, spurður um stöðu Ríkisútvarpsins á auglýsingamarkaði.

Í þættinum sagði Páll Gunnar að víða í löndunum í kringum okkur sé hægt að reka fjölmiðla af almannafé. „En það sem við höfum verið að leggja áherslu á og beindum í áliti til stjónvalda árið 2008 að þáttaka RÚV á auglýsingamarkaði, sérstaklega, skekkjir stöðuna í samkeppni á þessum markaði. Þarna er þá RÚV að kosta fjölmiðlarekstur bæði af almannafé og taka þátt í samkeppni um auglýsingatekjur við keppninautana sem hafa ekki sama aðgang að almannafé."

Páll Gunnar sagði að í álitinu hafi komið fram að eina leiðin til að laga skekkjuna væri að RÚV færi út af auglýsingamarkaði. „Það var ekki fallist á það. Við lögðum áherslu á það að það yrðu settar skýrari reglur um þáttöku RÚV á auglýsingamarkaði og af einhverju leyti var það lagað, en kannski ekki nóg. Ef ég man rétt hefur eftirlitsstofnun EFTA fyrr á þessu ári beint því til stjórnvalda að endurskoða þáttöku RÚV á auglýsingamarkaði."

Guðlaugur Þór Þórðarson, þingmaður Sjálfstæðisflokksins, ræddi einnig málefni RÚV í þættinum í dag. Hann sagði að það hafi verið „tabú" að ræða um stöðu ríkisfyrirtækisins á markaðnum. En afhverju? „Það er góð spurning. Ég held að menn séu hræddir við fjölmiðlana og það sé ekki auðvelt að taka þá umræðu."

Hann var spurður að því hvort að það sé eðlilegt að RÚV sé á auglýsingamarkaðnum: „Mér finnst það ekki eðlilegt," sagði Guðlaugur Þór.

Hægt er að hlusta á viðtalið við Pál Gunnar og Guðlaug Þór með því að smella á hlekkinn hér að ofan.