Flækt fast við dautt hreindýr

Tvö hreindýr til viðbótar fundust dauð á Suðausturlandi um helgina eftir að hafa flækt sig í girðingarvír. Aflífa þurfti eitt dýr til viðbótar, en það hafði verið fast á hornunum við dautt dýr í nokkra daga.

Sex manna hópur, skipaður fulltrúum Samtaka lífrænna neytenda, ásamt fulltrúum Náttúruverndarsamtaka Austurlands, fór í leiðangur á Flatey á Mýrum á laugardag til að ræða við bændur og hreinsa upp flæktan girðingavír.

Í leiðangrinum fundust tvö dauð hreindýr, til viðbótar við þau tvö sem drepist hafa á svæðinu á síðustu vikum.

Í gær þurfti síðan að aflífa eitt vegna þess hversu máttfarið það var. Það hreindýr hafði í einhvern tíma verið fast við dautt hreindýr á hornunum, en dýraeftirlitsmaður losaði þau í sundur fyrir nokkrum dögum.

Alls eru því fimm dýr á svæðinu dauð vegna frágangs á girðingum.

Myndir sem teknar voru af dýrunum sjást í meðfylgjandi myndskeiði. Þar má meðal annars sjá dýr sem hafa flækt sig og kafnað í appelsínugulum nælonþræði sem er vafinn um girðingavír sem hægt er setja á rafstraum.

„Við fórum austur vegna þess að okkur fannst mjög mikilvægt að fá bændurna til að setjast niður með okkur og skýra frá sínum málstað," segir Rósa Björk Halldórsdóttir, varaformaður stjórnar Náttúruverndarsamtaka Austurlands.

Hún segir ljóst að hreindýrin hafi skemmt girðingarnar. Það breyti því þó ekki að finna þurfi lausn á málinu í sátt við alla aðila.

Bæjarráð Hornafjarðar tók málið fyrir í annað sinn á fundi sínum síðdegis.

Þar kom fram að vilji er til að leita allra leiða til að tryggja velferð dýranna og takmarka eins og kostur er tjón bænda vegna ágangs þeirra. Bæjarstjóra var falið að vinna að lausn málsins.