Algert uppnám í brúðkaupinu

Auk Battle: Los Angeles geta kvikmyndahúsagestir valið úr tveimur nýjum myndum á morgun.

The Romantics segir frá sjö vinum sem tengdust sterkum böndum í háskóla en hafa síðan haldið hver í sína áttina. Sex árum síðar eru tveir vinanna, Lila (Anna Paquin) og Tom (Josh Duhamel) að fara að gifta sig og ákveða að kalla vinahópinn saman að nýju. Laura (Katie Holmes), Minnow (Dianna Agron), Jake (Adam Brody), Tripler (Malin Akerman) og Chip (Elijah Wood) mæta öll á svæðið stuttu fyrir brúðkaupið.

Laura á að vera brúðarmær Lilu, sem flækir málin þó töluvert því Laura og Tom voru kærustupar í háskóla og skildu að skiptum á nokkuð sársaukafullan hátt. Þetta setur brúðkaupið að sjálfsögðu í algert uppnám og ljóst að einhver mun ganga særður frá borði.

Ævintýramyndin The Way Back segir frá flótta hóps manna af ólíku þjóðerni úr síberísku gúlagi í síðari heimsstyrjöldinni og ótrúlegri ferð þeirra í gegnum fimm óvinveitt lönd. Með helstu hlutverk fara Ed Harris, Colin Farrell, Jim Sturgess og Saoirse Ronan. Leikstjóri er hinn reyndi Peter Weir sem síðast sendi frá sér Master and Commander með Russell Crowe í aðalhlutverki árið 2003. Á meðal annarra mynda hans eru The Truman Show, Dead Poets Society og Witness.