Japanir búnir að vinna einn góðan sigur í dag

Ísland mætir Japan á HM í handbolta í kvöld en japanska þjóðin er þegar búin að fagna einum góðum sigri í dag. Japanir tryggðu sér nefnilega sæti í átta liða úrslitum Asíukeppninnar með 5-0 sigri á Sádí-Arabíu í dag.

Shinji Okazaki skoraði þrennu í leiknum og Ryoichi Maeda skoraði hin tvö mörkin. Japan mætir heimamönnum í Katar í átta liða úrslitunum á föstudaginn. Sádarnir sitja hinsvegar eftir með sárt ennið í riðlinum en Jórdanía komst upp úr riðlinum með Japönum.

„Við erum búnir að bæta okkur með hverjum leik," sagði ítalski þjálfarinn Alberto Zaccheroni sem stýrir japanska landsliðinu í fótbolta.