Lygilegt langlífi Spaugstofunnar

„Þetta er auðvitað lygilegt,“ segir leikarinn Karl Ágúst Úlfsson. Fjögur hundraðasti þáttur Spaugstofunnar verður sýndur á Stöð 2 í kvöld. Þættirnir hófust í Ríkissjónvarpinu árið 1985 og hafa verið sýndir við miklar vinsældir allar götur síðan, eða í 26 ár.

„Upphaflega, þegar við gerðum samning um að gera vikulega fréttaþætti, réði Hrafn Gunnlaugsson, þáverandi dagskrárstjóri, okkur til að gera fjóra þætti til reynslu. Hann sagði að ef þeir virkuðu væri hann til í að framlengja samninginn. Núna eru þeir sem sagt orðnir fjögur hundruð,“ segir Karl Ágúst.

Þátturinn í kvöld verður með örlítið breyttu sniði en undanfarið. „Við búum okkur til verðlaunaafhendingu sem minnir kannski á Óskarinn eða Edduna. En við erum kannski að verðlauna fyrir aðra hluti en á þeim ágætu hátíðum.“

Aðspurður segir hann að veturinn hjá nýjum vinnuveitanda hafi gengið með ólíkindum vel. „Við erum mjög ánægðir og það var tekið mjög vel á móti okkur á nýjum vinnustað.“ Hann segir áhorfið einnig mjög viðunandi, að því hann best veit.

Fjórir þættir eru eftir af Spaugstofunni á þessum vetri. Karl Ágúst og félagar fara í frí í lok mars en snúa aftur á skjáinn næsta haust, enda undirrituðu þeir tveggja ára samning við Stöð 2 í fyrra. - fb