Fjögur hundruð vilja vera fréttamenn á RÚV

„Það er ánægjulegt að sjá þennan áhuga á bæði RÚV og fréttastofunni. En þetta lýsir jafnframt atvinnuástandinu,“ segir Óðinn Jónsson, fréttastjóri RÚV.

Ríkissjónvarpið auglýsti á dögunum nokkrar afleysingastöður á fréttastofunni. Alls bárust 393 umsóknir um 5-7 stöður í Efstaleiti og 16 umsóknir um eina stöðu á Akureyri. „Þetta kom skemmtilega á óvart,“ segir Óðinn, sem segir mikið af flottum umsóknum hafa borist frá vel menntuðu og áhugaverðu fólki.

Af þessum fjögur hundruð umsækjendum voru á milli 20-30 boðaðir í viðtöl og þrettán þeirra fengu svo að þreyta stíft fréttamannapróf. Búið er að ganga frá ráðningum á þremur fréttamönnum og býst Óðinn við að ganga frá því sem á vantar eftir helgi. Snæfríður Ingadóttir, sem meðal annars hefur starfað á DV, Fréttablaðinu og Skjá einum, var ráðin sem fréttamaður á Akureyri og Morgunblaðsmennirnir fyrrverandi Jóhann Bjarni Kolbeinsson og Dagur Gunnarsson munu hefja störf í höfuðborginni innan tíðar.

„Það er augljóslega margt ungt fólk að leita eftir áhugaverðu starfi. Því miður höfum við ekki pláss fyrir fleiri að sinni,“ segir Óðinn.- hdm