Tómas leikur pólskan vísindamann

Leikarinn Tómas Lemarquis fer með stórt hlutverk í kvikmyndinni The Errors of the Human Body sem framleidd er í Þýskalandi. Tómas leikur þar pólskan vísindamann en tökur fóru að mestu fram í Max Planck stofnuninni, sem er ein stærsta vísindastofnun Evrópu. Kvikmyndin er í leikstjórn Ástralans Erons Sheean og með aðalhlutverk fara Rik Mayall, sem lék í The Young Ones og The Black Adder, og hin þýska Karoline Herfurth, sem fór með hlutverk í myndunum Ilmurinn og Lesarinn.

Umboðsmaður Tómasar í Berlín kom honum í samband við leikstjórann, sem hafði þá séð kvikmyndina Nóa Albinóa og óskaði eftir Tómasi í hlutverk vísindamannsins. „Þetta var skemmtilegt verkefni og það var mikill heiður að fá að leika á móti Rik og Karoline. Hún er rísandi stjarna hér í Þýskalandi og Rik er goðsögn innan bresku grínsenunnar," segir Tómas og bætir við að Rik sé mjög skemmtilegur og gamansamur náungi.

Öll samtöl í kvikmyndinni fara fram á ensku og því þurfti Tómas að leggjast í nokkra rannsóknarvinnu þar sem persóna hans talar ensku með pólskum hreim. „Ég hafði samband við fjölda Pólverja hér í Berlín og fékk að hlusta á þá tala og tók einnig upp á segulband. Það búa margir Pólverjar í borginni enda er ekki nema um tveggja tíma lestarferð héðan til Póllands. Þeir voru mjög hjálpsamir við undirbúninginn en ég veit ekki hvort mér muni takast að blekkja þá í þessu hlutverki. Ég vona þó að ég nái að blekkja alla aðra," segir Tómas og hlær.

Búið er að selja dreifingarrétt kvikmyndarinnar bæði í Þýskalandi og Ástralíu og verður gaman að sjá hvort hún ratar hingað til lands.- sm