Ekki fleiri íþróttahús fyrr en hin fullnýtast

Ný íþróttamannvirki með mikla afkastagetu á ekki að byggja á höfuðborgarsvæðinu fyrr en sveitarfélögin á svæðinu hafa komið sér saman um staðsetninguna. Þetta er ein tillagna sameiginlegs starfshóps sveitarfélaganna.

Samtök sveitarfélaga á höfuðborgarsvæðinu skipuðu starfshópinn í vor til að vinna að breyttum rekstri íþróttamannvirkja og sundlauga og endurskoðun íþróttastyrkja. Fréttablaðið hefur áður sagt frá hugmyndum hópsins varðandi sundstaðina.

Starfshópurinn leggur til að gert verði svæðisskipulag fyrir íþróttafélög á höfuðborgarsvæðinu í heild í því skyni að auka nýtingu mannvirkja sem þegar eru byggð. „Fyrir liggur í greiningu hópsins að mikil umframafkastageta er fyrir hópíþróttir í Kópavogi sem mikilvægt er að nýta til fulls áður en frekari nýframkvæmdir fara í gang," segir í tillögum hópsins. Verði farið að þessu má búast við að íþróttaiðkendum úr nágrannasveitarfélögunum verði stefnt í Kópavog til æfinga.

Þá vill starfshópurinn koma upp sameiginlegri gjaldskrá um leigu á íþróttatímum og gagnabanka um áhöld og tæki sem hægt verði að leigja á milli íþróttahúsa. Einnig að kannað verði með sameiginleg innkaup og útboð á vöru og þjónustu.

„Staðsetning dýrustu mannvirkja sem hafa mesta afkastagetu verði framvegis ákveðin í samvinnu sveitarfélaga og með það að leiðarljósi að tryggð sé viðunandi nýting til framtíðar. Þar er einkum átt við sérhæfð mannvirki eða greinar þar sem iðkendur eru tiltölulega fáir á hverju svæði," segir starfshópurinn.

Jafnframt er lagt til að reglur um afreksstyrki og ferðastyrki verði samræmdar. Líka reglur um frístundakort og hvatagreiðslur þannig að „almennt geti börn og unglingar nýtt styrki viðkomandi sveitarfélags til æfinga með íþróttafélagi á höfuðborgarsvæðinu". Þetta myndi til dæmis þýða að barn sem fær 25 þúsund króna frístundastyrk frá Reykjavíkurborg gæti nýtt hann til að stunda æfingar með íþróttafélagi í Hafnarfirði.

gar@frettabladid.is