Þriðji þjófurinn ræktaði kannabis

Lögreglan á höfuðborgarsvæðinu yfirheyrði í gærdag konu, sem grunuð er um að hafa stolið allmiklu af fatnaði úr verslunum. Að auki hafði hún í vörslu sinni nokkrar kannabisplöntur.

Þetta mál er ótengt málinu sem upp kom þegar mæðgur voru teknar við að stela fatnaði í Smáralind. Þær reyndust hafa safnað geysimiklu af fötum, skóm og fylgihlutum, þegar húsleit var gerð á heimilum þeirra. Móðirin reyndist einnig vera með litla kannabisræktun í sérútbúnu herbergi heima hjá sér. Mæðgurnar losnuðu úr gæsluvarðhaldi í fyrradag, enda ekki lögð fram krafa af hálfu lögreglu um framlengingu.

Rannsókn þess máls leiddi lögreglu á spor þriðju konunnar, sem er af austurlensku bergi brotin eins og hinar tvær. Hún var handtekin í fyrradag og yfirheyrð í gær eins og áður sagði. Húsleit var gerð heima hjá henni í Grafarholti, að fengnum úrskurði. Þar fannst allmikið magn af fatnaði, sem talinn er vera stolinn, auk plantnanna, sem hún ræktaði í sérútbúnu rými.

Konan sem um ræðir er um þrítugt og hefur búið hér á landi um skeið.- jss