Auki tekjur ríkissjóðs um tæpa 10 milljarða

Steingrímur J. Sigfússon fjármálaráðherra mælti í gær fyrir frumvarpi um ráðstafanir í ríkisfjármálum, frumvarpi um nýjan fjársýsluskatt og frumvarpi um lokafjárlög ársins 2010.

Frumvarp um ráðstafanir í ríkisfjármálum og frumvarp um fjársýsluskatt eru liðir í sérstökum tekjuöflunaraðgerðum fjárlagafrumvarpsins fyrir næsta ár. Með aðgerðunum á að auka tekjur ríkisins um 9,7 milljarða.

Fjársýsluskattur er nýr skattur sem leggst á fjármálafyrirtæki, vátryggingafélög og lífeyrissjóði meðal annars. Íbúðalánasjóður er eina opinbera stofnunin í bili sem mun þurfa að borga skattinn, sem er 10,5 prósent. Fjársýsluskattur skal borgaður af öllum tegundum launa eða þóknana fyrir starf. Skattinum er ætlað að skila ríkinu 4,5 milljörðum í tekjur.

Þá kveður frumvarpið á um að dregið verði úr frádráttarbærni iðgjalda vegna viðbótarlífeyrissparnaðar, svo að hámark launþega verði tvö prósent af launum í stað fjögurra prósenta áður. Þetta er talið munu skila 1,4 milljörðum króna. Tekið verður upp viðbótarskattþrep fyrir auðlegðarskatt, en tekjur af því eiga að vera nálægt 1,5 milljörðum.

Innleiðing kolefnisgjalds verður lokið og á það að skila 800 milljónum króna.

Loks á að hækka veiðigjald frekar og fá þannig inn 4,5 milljarða króna á ársgrundvelli, en 1,5 milljarða á næsta ári. Þessar breytingar verða lagðar fram í frumvarpi um breytingu á lögum um stjórn fiskveiða.

- þeb