Neyddust til að nota árásarhnapp

Starfsmenn í verslun Samkaupa á Selfossi óttuðust um eigið öryggi vegna skrílsláta ungmenna í versluninni á sunnudagskvöld og notuðu árásarhnapp til að kalla til lögreglu.

„Það voru gríðarleg læti á sunnudagskvöldið og starfsstúlkurnar voru orðnar hræddar og pirraðar,“ segir Ragnhildur Vilhjálmsdóttir verslunarstjóri. Hún segir unglingana hafa barið í afgreiðsluborðin, rifið kjaft við starfsfólkið auk þess sem stolið hafi verið úr versluninni.

„Það þýðir ekkert að hringja í lögregluna og biðja hana að skakka leikinn, þeir segjast ekki hafa mannskap til að koma,“ segir Ragnhildur. Starfsmennirnir hafi því neyðst til að nota árásarhnapp sem aðeins eigi að nota sé ráðist á starfsmennina.

Unglingar hafa lengi safnast í anddyri verslunarinnar á kvöldin, en hafa yfirleitt verið til friðs, segir Ragnhildur. Undanfarið hafi hins vegar ófremdarástand ríkt. Eftir atburði helgarinnar verður öryggisvörður fenginn til starfa í versluninni á ákveðnum tímum dags.

Ragnhildur segir lausnina verða að vera þá að foreldrarnir tali við börnin sín. „Það er okkar, foreldranna, að sjá til þess að unglingarnir hagi sér eins og fólk, ekki lögreglu, öryggisvarðar eða mitt sem verslunarstjóra.“ - bj