Aldrei fleiri farþegar hjá Strætó

Yfir 900 þúsund farþegar stigu inn í strætisvagna Strætó bs. í októbermánuði, og hafa þeir aldrei verið fleiri. Strætó telur farþega í öllum vögnum í þrjá daga í október ár hvert.

Í sama mánuði í fyrra voru farþegarnir rúmlega 76 þúsundum færri en nú, sem þýðir að farþegum fjölgaði um 9,15 prósent milli ára. Sé horft aftur til ársins 2005 eru farþegar nú rúmlega fjörutíu prósentum fleiri nú en í október þá, að því er fram kemur í tilkynningu frá Strætó.

Yfir fimm þúsund farþegar fara nú með leið eitt á hverjum degi að meðaltali, og yfir fjögur þúsund með leið sex. Við þessu hefur verið brugðist með því að kaupa lengri vagna sem geta tekið fleiri farþega. Það hefur þó ekki alltaf dugað til, að sögn Einars Kristjánssonar, sviðsstjóra skipulags- og þróunarsviðs Strætó. Aukavögnum hefur því stundum verið bætt við á mestu álagstímunum.

Færri farþegar eru nú en áður á sumum leiðum, til að mynda leiðum tvö og fimm, en þær leiðir hættu akstri á kvöldin og um helgar.

Nýlega greindi Strætó frá því að farþegum á fyrstu níu mánuðum ársins hefði fjölgað um tæpa milljón milli ára.- þeb