Fíkniefnasendingin tekin í Straumsvík

Hið mikla magn fíkniefna sem lögreglan á höfuðborgarsvæðinu lagði hald á fyrr í þessum mánuði var tekið í Straumsvík. Það hafði komið hingað til lands um borð í gámaskipinu Franciscu frá hollensku skipafélagi og búið um það í nokkrum pakkningum. Skipið var að koma frá Rotterdam í Hollandi.

Það var hinn 10. október síðastliðinn sem lögreglan lagði hald á sendinguna. Um var að ræða fíkniefni í kílóavís. Mikið magn af e-töflum var í pakkanum, en einnig kókaín, amfetamín og sterar. Pakkann fundu lögregla og tollgæsla í gámi í skipinu.

Útilokað er að segja með vissu til um umfang smyglsins á þessu stigi málsins, þar sem efnin eru nú til greiningar hjá Rannsóknastofu í lyfja- og eiturefnafræði, samkvæmt upplýsingum Fréttablaðsins. Niðurstöður greiningarinnar sýna hversu mikill styrkleiki efnanna er og hvert magn þess hefði orðið, komið í sölu á götunni.

Tveir karlmenn hafa verið úrskurðaðir í gæsluvarðhald í þessu umfangsmesta smyglmáli sem komið hefur upp á árinu.

Eftir því sem næst verður komist var fíkniefnapakkinn sendur að utan á lítið fyrirtæki hér. Starfsmaður þess, karlmaður á sextugsaldri, er í haldi lögreglu vegna málsins, en hann var handtekinn 10. október og úrskurðaður í gæsluvarðhald til 8. nóvember. Sá maður hefur ekki komið við sögu hjá lögreglu áður.

Karlmaður á fimmtugsaldri kom síðan hingað til lands með flugi um helgina og var handtekinn við komuna til landsins. Hann var í kjölfarið úrskurðaður í gæsluvarðhald til 11. nóvember.

Síðarnefndi maðurinn hefur áður komið við sögu hjá lögreglu, meðal annars vegna fíkniefnamála, og tvisvar hlotið dóma í héraðsdómi.

Rannsókn lögreglu er afar umfangsmikil og mikil vinna að baki, sem hefur staðið yfir um nokkurra vikna skeið. Lögregla hefur unnið þetta verkefni í samvinnu við tollgæsluna.

jss@frettabladid.is