Með álklædda poka undir þýfið

Mæðgur sem sitja nú í gæsluvarðhaldi, grunaðar um að hafa stolið geysimiklu magni af fatnaði úr verslunum, höfðu útbúið sérstaka poka til að koma í veg fyrir að þjófavarnarkerfi verslana næmu innihaldið. Pokinn sem þær voru með þegar lögreglan tók þær við iðju sína í verslun í Smáralind var úr pappír en búið að fóðra hann að innan með álpappír.

Hæstiréttur hefur staðfest úrskurð Héraðsdóms Reykjavíkur þess efnis að mæðgurnar skuli sitja í gæsluvarðhald þar til á morgun.

Í gæsluvarðhaldskröfu lögreglunnar á höfuðborgarsvæðinu kemur enn fremur fram að þegar leitað hafi verið á heimili móðurinnar, að fengnum dómsúrskurði, hafi fundist þar, auk þýfisins, 21 kannabisplanta sem hún hafi ræktað í sérútbúnu herbergi.

Þýfið, mest fatnaður, skór og fylgihlutir, sem fannst heima hjá mæðgunum fyllti samtals 40 svarta ruslapoka. Einnig fann lögregla tæplega hálfa milljón króna í reiðufé.

Áætlað verðmæti þýfisins er tíu til fimmtán milljónir króna. Fram kemur að viðurlög við verknaði af þessari stærðargráðu geti verið allt að sex ára fangelsi.

- jss