Jólin flutt í kössum til Úkraínu

Samtökin KFUM og KFUK standa í áttunda sinn fyrir verkefninu Jól í skókassa. Í því er nokkrum jólagjöfum pakkað ofan í skókassa sem síðan eru sendir til þurfandi barna í Úkraínu. Markmiðið er að gleðja þurfandi börn í anda jólanna.

Um 50 milljónir búa í Úkraínu en þar er mikið atvinnuleysi. Skókössunum er dreift á svæði þar sem er allt að 80 prósenta atvinnuleysi. Kassarnir fara meðal annars á munaðarleysingjahæli, barnaspítala og til barna fátækra einstæðra foreldra.

Tekið er á móti skókössum í aðalstöðvum KFUM og KFUK, Holtavegi 28, alla virka daga frá klukkan 9 til 17, en síðasti skiladagur er 12. nóvember. Frekari upplýsingar um verkefnið er að finna á heimasíðunni skokassar.net.- kóp