Brot á erlendum fyrirtækjum

Skattlagning á vaxtatekjur erlendra fyrirtækja á Íslandi er skýlaust brot á samningnum um evrópska efnahagssvæðið, EES-samningnum. Skattlagningin er letjandi fyrir erlenda fjárfestingu ofan á gjaldeyrishöft sem valda því að erlendur aðili sem hefur fjárfest hér getur ekki fengið fjárfestingu sína greidda fyrr en höftum verður aflétt.

Þetta kom fram í erindi Völu Valtýsdóttur, sviðsstjóra skatta- og lögfræðisviðs Deloitte, á morgunverðarfundi um skattamál sem fyrirtækið efndi til ásamt Samtökum fjárfesta, NASDAQ OMX Iceland (Kauphöll Íslands) og Samtökum atvinnulífsins síðastliðinn föstudag.

Vala sagði jafnframt að þrátt fyrir að tekjuskattslögum hefði verið breytt vegna skattlagningar arðs, reyndar vegna brots á EES-samningnum, hefði þetta ekki verið haft í huga þegar vextir til erlendra lögaðila hefðu verið gerðir skattskyldir. Þar sem skattlagningin er brúttó, þ.e. vaxtagreiðslan er skattlögð í stað hagnaðar (eins og gildir í tilviki innlendra lögaðila), samræmist löggjöfin ekki EES-samningnum, sagði Vala.

Í erindi Völu kom einnig fram að það væri algengt í nágrannalöndum okkar að undanþiggja vexti til erlendra lögaðila skatti, sérstaklega ef viðkomandi félag væri innan EES eða tvísköttunarsamningur í gildi á milli viðkomandi landa. - shá