Hefur störf hjá SÞ í Afganistan

Gengið hefur verið frá ráðningu Ingibjargar Sólrúnar Gísladóttur í starf yfirmanns UN Women í Afganistan. Ingibjörg Sólrún mun flytjast til Kabúl, höfuðborgar Afganistan, um miðjan næsta mánuð.

Fréttablaðið greindi frá því í síðustu viku að Ingibjörgu Sólrúnu hefði verið boðið starfið en ráðning sem þessi væri tímafrek sökum pappírsvinnu. Nú hefur hún greint frá því að þeirri vinnu sé lokið.

UN Women er stofnun innan Sameinuðu þjóðanna (SÞ). Stofnunin vinnur í þágu kvenna og jafnréttis í þróunarlöndum og á stríðssvæðum.- þeb