Ráðherra segir vændisrannsókn koma til greina

Vel kemur til greina að láta rannsaka umfang og eðli vændis á Íslandi á næstunni. Þetta segir Ögmundur Jónasson innanríkisráðherra.

„Mér finnst sjálfsagt að taka málið til skoðunar á þeim forsendum og ég held að það sé mjög mikilvægt að halda því í stöðugri umræðu,“ segir Ögmundur og bætir við að það komi vel til greina að setja saman starfshóp til að kanna málin til hlítar.

Tíu ár eru liðin frá því að dómsmálaráðuneytið lét gera úttekt á stöðu vændis á Íslandi. Síðan þá hafa ýmsar lagabreytingar verið gerðar, svo sem bann við nektarstöðum og kaup á vændi.

„Við erum með þessi mál í stöðugri athugun og umræðu. Allt kemur til greina í því efni.“

Steinunn Gyðu- og Guðjónsdóttir, framkvæmdastýra vændisathvarfs Stígamóta, segir brýna þörf á því að gera frekari rannsóknir. Nýjustu talnagögnin séu frá 2001 og 2008, en nauðsynlegt sé að sjá hvaða árangri lagabreytingar síðustu ára hafa skilað.

„Við þurfum mun yfirgripsmeira yfirlit og nýjar tölur. Sér í lagi um það hversu margir það eru sem hafa keypt vændi,“ segir hún. „Okkur vantar yfirlit yfir eftirspurnina. Við erum alltaf að vitna í erlendar rannsóknir í því efni. Einnig veit hversu margar konur og karlar það eru hér á landi sem stunda vændi.“- sv